Ақпанның 5 — Григориан күнтізбесінде жылдың 36-шы күні. Жылдың аяғына 329 (кібісе жылдарда 330) күн қалады.
Мерекелер
- Мексиканың мемлекеттік мерекесі - Конституция күні.
Оқиғалар
- 1945 жылы - Алматыда алғашқы қазақ консерваториясы ашылды.
- 1996 жылы - Қазақстан телекоммуникациялар консорциумы (КАТЕЛКО) құрылды.
- 2001 жылы - Алматыда «Сөзтаным» журналы жарық көрді.
- 2002 жылы - Pepsi компаниясы Бритни Спирстың қатысуымен құны 9 млн. долларлық әлемдегі ең қымбат жарнама ролигін түсірді.
- 2006 жылы - Ұлыбританияның Мюррейфилд регби клубы стадионында өткен Шотландия мен Франция арасындағы Регби бойынша алты ұлт кубогы ойынында 13525 көрермен Шотландияның ұлттық туын жасады. Аталмыш көріністен қуат алған шотландтықтар француздарды 20:16 есебімен ұтып кетті.
- 2008 жылы - «Нұр Отан» партиясының Астана қалалық филиалы сыбайлас жемқорлықпен күреске бағытталған қоғамдық кеңес құрды.
- 2008 жылы - Әділет министрлігі заң жобаларының сапасы мен тиімділігін арттыру мақсатында әдістемелік ұсынымдар әзірледі.
- 2009 жылы - Қарағандыда малдәрігерлік зертхана ашылды. Ол толығымен халықаралық стандарттарға сай келеді. Заманауи жабдықтарымен жарақтанған жаңа зертхана аса қауіпті мал ауруларын қысқа мерзімде сынамадан өткізуге мүмкіндік береді. Мұнда сондай-ақ азық-түлік өнімдері де тексеріледі. Бұл қазақстандағы осындай алтыншы зертхана.
- 2010 жылы - Қазақстан мен Норвегия сыртқы істер министрліктері арасында өзара түсіністік туралы меморандумға қол қойылды. Аталған құжатқа қол қою рәсімі Қазақстан Республикасының Үкімет басшысы Кәрім Мәсімов пен Норвегия Корольдігінің Мұрагер ханзадасы Хокон Магнуспен кездесуі барысында өтті.
- 2010 жылы - Мемлекет басшысы Нұрсұлтан Назарбаев Қазақстан Республикасының иммунитетін және оның меншігін шет ел мемлекеттер соттарының құзыретінен қамтамасыз етуге бағытталған «Қазақстан Республикасының кейбір заңнамалық актілеріне мемлекеттің және оның меншігінің иммунитеті, аралық соттар және халықаралық коммерциялық төрелік қызметін жетілдіру мәселелері бойынша өзгерістер мен толықтырулар енгізу туралы» Заңға қол қойды.
- 2010 жылы - Норвегия Корольдігінің тақ мұрагері, ханзада Хокон Магнус елордадағы БҰҰ Даму бағдарламасы мен норвегиялық SYSLAB жобасының қолдауымен ашылған Инновацияларды дамыту және жұмысқа орналасуға жәрдемдесу орталығын ашты. SYSLAB жобасы 1992 жылы Норвегияның «Хиб-Сислаб» кәсіпорынында кіші және орта бизнестің мақсаттарын біріктіру үшін құрылған. Жобаның авторы және негізін қалаушы - Берген қаласының Жоғары технологиялар орталығының директоры Ян Йохонссен. Елімізде аталған жобаның Алматы, Астана және Шымкент қалаларында орталықтары бар. Жобаның негізгі мақсаты - ұзақ уақыт бойы жұмыссыз жүрген жоғары білімді маманның жұмысқа орналасуына қол ұшын беру.
Туғандар
- 1840 жылы - үрмелі шинаны ойлап тапқан ағылшын өнертапқышы, «Данлоп» компаниясының негізін қалаушы Данлоп Джон Бойд дүниеге келді.
- 1840 жылы - тегі американдық ағылшын өнертапқышы, «Максим» пулемётін жасаушы Хайрем Максим дүниеге келді.
- 1878 жылы - француз өнеркәсіпшісі, «Ситроен» концернінің негізін қалаушы Андре-Гюстав Ситроен дүниеге келді.
- 1930 жылы - қазақ экономисі, экономика ғылымдарының докторы, профессор, Қазақстан Республикасы Гуманитарлық Ғылымдар Академиясының академигі Елбосынов Сүният Құсайынұлы дүниеге келді.
- 1932 жылы - филология ғылымының докторы (1977), профессор (1979) Мархабат Томанов дүниеге келді.
- 1936 жылы - домбырашы, дирижёр, Қазақстанның халық әртісі, Қазақстанның еңбек сіңірген мәдениет қызметкері Ғабдиев Рысбай Қисметоллаұлы дүниеге келді.
- 1940 жылы - жазушы Бақтығұл Ойшыбаев дүниеге келді.
- 1945 жылы - биология ғылым докторы (1995), профессор (1987). ҚР Инженер академиясының корреспондент мүшесі (2003) Ермек Жұмабеков дүниеге келді.
- 1949 жылы - «Алматыкітап» акционерлік қоғамының президенті Элеонора Нығметқызы Баталова дүниеге келді.
- 1954 жылы - әнші, Қазақстан Республикасының еңбек сіңірген әртісі Бағдат Сәмидинова дүниеге келді.
- 1961 жылы - Мұхтар Әуезов атындағы әдеби-мемориалды үй-мұражайының директоры, филология ғылымының кандидаты Диар Асқарұлы Қонаев дүниеге келді.
- 1969 жылы - жазушы, мәдениеттанушы және журналист, Ш.Айманов атындағы «Қазақфильм» ҰК» бас редакторы Дидар Амантай дүниеге келді.
- 1985 жылы - португал футболшысы, испандық «Реал Мадрид» клубы мен Португалия құрамасында өнер көрсетіп жүрген Криштиану Роналду дүниеге келді.
- 1986 жылы - «Орда» тобының белді әншісі, биші, актёр Дастан Оразбеков дүниеге келді.
- 1995 жылы - «Маңғыстау Бейнеу» өңірінің біртуар азаматы Хадис Ақылбек дүниеге келді.
Қайтыс болғандар
- 1932 жылы - тегі фольклортанушы, этнограф Диваев Әбубәкір Ахметжанұлы Ташкентте қайтыс болған.