Антара ибн Шаддад, араб.: عنترة بن شداد العبسي; толық аты Антара ибн Шаддад ибн Амр ибн Муавия аль-Абси (525 —615) — араб ақыны.
Әкесі ру ішіндегі білікті "бену-абс" ақсүйек тұқымынан шыққан, шешесі - Зубиба негр қызы, күң.
Антара ибн Шаддад ру, тайпалардың арасындағы соғыстарда ерлік көрсеткені үшін ғана өз руының тең құқықты азаматы болып танылған. Ақыры бір шайқаста қаза тапқан.
Поэзиясының негізгі тақырыбы - сүйген қызы Аблаға арналған махаббат жырлары мен өзі қатысқан сансыз шайқастар оқиғалары. Бізге жеткен өлеңдері үзінділер күйінде сақталған.
Антара ибн Шаддад туралы аңыз, әңгіме көп. "Сират Антара" ("Антараның жолы") атты халық романы да соған арналған. Еуропа рыцарьлық романдары тәрізді бұл шығармада Антара ибн Шаддад әлсізді жақтаушы адал, әжет батыр болып суреттеледі.
Дереккөздер өңдеу
- “Қазақстан”: Ұлттық энциклопедия/Бас редактор Ә. Нысанбаев – Алматы “Қазақ энциклопедиясы” Бас редакциясы, 1998